تاجیکستان: موضع ما در قبال به‌رسمیت‌شناختن طالبان تغییرناپذیر است

به گزارش دفتر منطقه‌ای خبرگزاری تسنیم، خیرالدین عثمان‌زاده، رئیس مرکز تحقیقات راهبردی ریاست‌جمهوری تاجیکستان در یک نشست خبری در دوشنبه صحبت می‌کرد، اظهارداشت پس از به قدرت رسیدن طالبان در افغانستان و افزایش تهدیدها از طرف این کشور، تاجیکستان کنترل مرزهای مشترک خود را تقویت کرده و تعداد پاسگاه‌های مرزی را به بیش از 100 پاسگاه افزایش داده است.

وی با ابراز نگرانی از تهدیدات امنیتی از طرف افغانستان، تأکید کرد موضع تاجیکستان در قبال به‌رسمیت شناختن طالبان به‌عنوان یک دولت، تغییرناپذیر است.

عثمان‌زاده تأکید کرد که موضع این کشور در قبال طالبان تغییری نکرده است و روابط این کشور با افغانستان تنها در سطح اقتصادی پا برجا خواهد بود، چون از دید او روابط اقتصادی بیشتر به مردم افغانستان ربط دارد تا هیئت حاکمه آن کشور.

به گزارش «ایندیپندنت» وی اظهارداشت: با توجه به همسایگی که با این کشور داریم، همکاری‌های اقتصادی را متوقف نخواهیم کرد، زیرا حمایت تاجیکستان از مردم افغانستان در درجه اول به تقویت همکاری‌های اقتصادی بستگی دارد.

به گفته این مقام تاجیکستان، دوشنبه تمام دهلیزهای حمل و نقل خود را در اختیار همه کشورهای همسایه و سازمان‌های بین‌المللی قرار داده است که می‌توانند کمک‌های بشردوستانه به افغانستان ارائه کنند، اما به گفته او، در مورد نگرش سیاسی، موضع تاجیکستان در قبال طالبان تغییرناپذیر است.

رئیس مرکز تحقیقات راهبردی ریاست‌جمهوری تاجیکستان بار دیگر بر ضرورت ایجاد حکومت فراگیر با رعایت حقوق زنان و دختران در کار و تحصیل در افغانستان تاکید کرد و افزود که این خواست تقریباً همه کشورهای جهان از طالبان است.

انتهای پیام/.