کمیته پناهندگان افغان در تاجیکستان ضرب‌الاجل برای خروج اتباع افغان را رد کرد
رئیس کمیته پناهندگان افغان در «دوشنبه» در پی انتشار گزارش‌هایی مبنی بر تعیین ضرب‌الاجل برای خروج پناهجویان افغان از تاجیکستان، این گزارش‌ها را رد کرد و گفت تاکنون هیچ موردی از اخراج اجباری به ثبت نرسیده است.
به گزارش دفتر منطقه‌ای خبرگزاری تسنیم، «مصور بهادری» رئیس کمیته پناهندگان افغان در شهر دوشنبه، در گفتگو با آسیاپلاس تاجیکستان، گزارش‌ها در مورد اخراج اجباری پناهجویان افغان از این کشور را نادرست خواند.
وی گفت: «تا به امروز هیچ‌کس برای گزارش یا شکایت از اخراج اجباری به کمیته مراجعه نکرده است.»
این اظهارات در حالی مطرح می‌شود که پیش‌تر برخی منابع خبری از تعیین مهلت 15 روزه برای خروج پناهجویان افغان توسط مقامات تاجیکستان خبر داده بودند.
در همین حال، سفارت افغانستان در دوشنبه نیز اعلام کرده است که اطلاعی در مورد اقدامات رسمی دولت تاجیکستان درباره پناهجویان افغان ندارد و تاکنون از سوی مقامات میزبان، تماسی با سفارت در این زمینه گرفته نشده است.
با این حال، مقام‌های رسمی تاجیکستان تاکنون هیچ موضع‌گیری علنی در خصوص صحت یا رد گزارش‌های منتشرشده انجام نداده‌اند.
گفته می‌شود که تاجیکستان یکی از مقاصد مهاجرت افغان‌ها پس از سقوط دولت پیشین در سال 2021 بوده است. با وجود این که این کشور میزبان پناهجویان افغان بوده، اما زیرساخت‌های محدود و روابط سیاسی با حکومت کابل، همواره نگرانی‌هایی را درباره امنیت، اقامت و آینده پناهجویان افغان به همراه داشته است.
انتهای پیام/.
