طالبان: تلاش‌ها برای حل دیپلماتیک تنش‌ها با تاجیکستان جریان دارد
در پی افزایش تنش‌ها بین طالبان و تاجیکستان طی هفته‌های اخیر، یک عضو طالبان اعلام کرد که تلاش‌های برای حل دیپلماتیک مشکلات جریان دارد.
به گزارش دفتر منطقه‌ای خبرگزاری تسنیم، «روح‌الله عمر» عضو کمیسیون فرهنگی وزارت اطلاعات و فرهنگ طالبان با اظهار اینکه تاجیکستان همسایه خوب افغانستان است، اعلام کرد که تلاش‌ها برای حل دیپلماتیک تنش‌های بین افغانستان و تاجیکستان جریان دارد.
وی اظهارداشت که دولت طالبان خواستار روابط خوب با همه کشورها است و اجازه استفاده خاک افغانستان علیه دیگر کشورها از جمله تاجیکستان را نخواهد داد.
عمر به «طلوع نیوز» گفت: وزارت خارجه با تمام کشورها در ارتباط است و برای ساختن روابط خوب تلاش می‌کند؛ انشاالله با تاجیکستان نیز در مورد تمام موضوعات گفت‌وگو خواهد شد.
گفتنی است که رئیس جمهور تاجیکستان پس از تصرف افغانستان توسط طالبان بارها تاکید کرده که در افغانستان باید از طریق انتخابات و براساس اراده مردم این کشور یک دولت فراگیر ایجاد شود.
طالبان این اظهارات را مداخله در امور داخلی افغانستان دانسته و در واکنش به استقرار نیروهای تاجیکستانی در مرز مشترک دو کشور هزاران نیرو را در آنجا مستقر کرده است.
در همین حال، رئیسان جمهوری روسیه و تاجیکستان نیز اخیراً در یک گفت‌وگوی تلفونی بر تقویت تدابیر امنیتی در مرز میان تاجیکستان و افغانستان تاکید کردند.
انتهای پیام/.
